Հայկական Բարեգործական Ընդհանուր Միութիւնը հիմնուած է 1906 թուականին, Գահիրէի մէջ, Եգիպտոս: Այսօր, դպրոցէն ներս, նշուեցաւ Միութեան Հիմնադիրներուն օրը, որոնք Պօղոս Նուպար Փաշայի գլխաւորութեամբ տեսիլքը ունեցած էին քով-քովի գալու, որպէսզի օգնութեան հասնէին Արեւմտեան Հայաստանի եւ Կիլիկիոյ տառապող հայութեան:
Ապրիլ 15-ի առաւօտեան, Ծաղկոցի, Նախակրթարանի եւ Երկրորդականի աշակերտները հաւաքուեցան դպրոցին բակը, այս առիթով պատրաստուած կապոյտ, ճերմակ եւ կարմիր 120-ամեակի շապիկներով (նուէր՝ Տէր եւ Տիկ. Ճօ եւ Սեդա Յովսէփեաններու կողմէ):
Միութեան քայլերգէն ետք, Աշակերտական Խորհուրդի խօսքը փոխանցեց շրջանաւարտ դասարանէն Կարօ Օհաննէսեան: Օրուան պատգամ՝ Պրն. Հրաչ Սեփեթճեան, իսկ փակման խօսքը արտասանեց Հոգաբարձական Կազմի ատենապետ՝ Պրն. Գէորգ Զօրեան:
Տիկ. Մարալ Ոսկեան յայտարարեց չորս անուն, որոնք երկար տարիներէ կը ծառայեն դպրոցին մէջ, դաստիարակելով յաջորդական սերունդներ. հայոց լեզուի ուսուցչուհի՝ Թագուշ Նալպանտեան, երաժշտութեան ուսուցչուհի՝ Արուս Անդրէասեան, մարզիչ՝ Տիգրան Հեքիմեան եւ երկարամեայ պաշտօնեայ՝ Ռաֆայէլ Արեւալօ:
Անոնք արժանացան ջերմ ծափահարութիւններու: Տօնական օրուան յաւելեալ փայլք հաղորդեցին Նախակրթարանին կողմէ ՀԲԸՄ-ին նուիրուած երկու խմբերգները, ղեկավարութեամբ Օրդ. Արուս Անդրէասեանի: Հաւաքը աւարտին հասաւ 120-ամեակի կարկանդակի բաժանումով:
Email
school@agbumds.org
© 2021 AGBU Manoogian-Demirdjian School, All Rights Reserved
Send Email